"KAMA MNATAKA MALI MTAIPATA SHAMBANI"

Posted on: November 10th, 2023

Na. Cosmas Mathias Njingo, GAIRO 

1,Karudi baba mmoja, toka safari ya mbali,

    Kavimba yote mapaja, na kutetemeka mwili,

    Watoto wake wakaja, ili kumtaka hali,

    Wakataka na kauli iwafe maishani.

(e. Jabiri Makame, Mkuu wa Wilaya ga Gairo, akikazgu mti wa Parachichi, Kijiji cha Masenge Kata ya Rubeho,alipotembea wanakikundi cha wakulima wa zao la parachichi|)

2. Akatamka mgonjwa, ninaumwa kwelikweli,

   Hata kama nikichanjwa, haitoki homa kali,

   Roho naona yachinjwa, kifo kimenikabili,

   Semeni niseme nini, kiwafae maishani.

3. Yakawatoka kinywani, maneno yenye akili,

    Baba yetu wa thamani, sisi tunataka mali,

    Urithi tunatamani, mali yetu ya halali,

   Sema iko wapi mali, itufae maishani? (P.T)

4. Baba aliye kufani, akajibu lile swali,

    Ninakufa maskini, baba yenu sina hali,

    Neno moja lishikeni, kama mnataka mali,

    Kama mnataka mali, mtayapata shambani.

5. Wakazidi kumchimba, baba mwenye homa kali,

    Baba yetu watufumba, hatujui fumbo hili,

    Akili zetu nyembamba, hazijajua methali,

    Kama tunataka mali, tutapataje shambani?

6. Kwanza shirikianeni, nawapa hiyo kauli,

   Fanyeni kazi shambani, mwisho mtapata mali,

   Haya sasa buriani, kifo kimeniwasili,

   Kama mnataka mali, mtayapata shambani.

7. Alipokwisha kutaja, fumbo hili la akili,

   Mauti nayo yakaja, roho ikaacha mwili,

   Na watoto kwa umoja, wakakumbuka kauli,

   Kama mnataka mali, mtayapata shambani.

8. Fumbo wakatafakari, watoto wale wawili,

   Wakakata na shauri, baada ya siku mbili,

   Wote wakawa tayari, pori nene kukabili,

   Kama mnataka mali, mtayapata shambani.

(Mkuu wa Wilaya ya Gairo, Mhe. Jabiri Omari Makame, akihamasisha Wananchi wa Kijijchi cha Masenge kata yaRubeho juu ya kilimo cha parachichi)

9.Shambani, mbegu nyingi mbalimbali,

   Tangu zile za mibuni, hadi zitupazo wali,

   Na mvua ikaja chini, wakaona na dalili,

   Kama mnataka mali, mtayapata shambani.

(Mkuu wa Wilaya ya Gairo, Mhe. Jabiri Omari Makame, akihamasisha Wananchi wa Kijijchi cha Masenge kata yaRubeho juu ya kilimo cha parachichi)

10. Shamba wakapalilia, bila kupata ajali,

     Mavuno yakawajia, wakafaidi ugali,

     Wote wakashangilia, wakakumbuka kauli,

     Kama mnataka mali, mtayapata shambani.

11. Wakanunua na ng'ombe, majike kwa mafahali,

     Wakapata na vikombe, mashine na baiskeli,

    Hawakuitaka pombe, sababu pombe si mali,

    Kama mnataka mali, mtayapata shambani.

12. Wakaongeza mazao, na nyumba za matofali,

     Pale penye shamba lao, wakaihubiri mali,

     Wakakiweka kibao, wakaandika kauli.

"KAMA MNATAKA MALI MTAYAPATA SHAMBANI".