TIMU YA MPIRA WA MIGUU YA HALMASHAURI YAANZA KUJIANDAA MICHUANO YA SHIMISEMITA

Posted on: July 18th, 2023

Na. Cosmas Mathias Njingo. GAIRO 

JULAI 18.2023

Kikosi kazi cha maangamizi cha Timu ya Watumishi ya Mpira wa Miguu 'DGC SPORTS CLUB' kabla ya mechi ya kirafiki dhidi ya Moro Kids ya Mjini Morogoro iliyopigwa katika Viwanja vya Shule ya Msingi Gairo 'A' Wilayani Gairo.

Awali Timu hizi mbili zilitarajiwa kuingiza uwanjani kukipiga kwa ajili ya kuwania Pikipiki kwenye michuano ya kuwania Pikipiki lakini mchezo huo haukufanyika km ulivyotarajiwa kufuatia Timu ya Moro Kids kuchelewa kuingia uwanjani hali iliyolazimu Uongozi wa Chama Cha Mpira wa Miguu Wilaya ya Gairo kwa kushirikiana na Viongozi wa timu hizo pamoja na waamuzi wa mchezo huo kwa kauli moja wakaipa ushindi mnono wa mezani wa Alama 3 Timu ya GDC Sports Club.

Baada ya ushindi huo wa Alama 3 kwa GDC Sports Club, timu hizo zikakubaliana kupimana nguvu kwenye mechi ya kirafiki ambapo zilitoshana kwa sare ya bao 1-1.

Moro Kids ilikuwa ya kwanza kuigegeda timu ya GDC SC katika kipindi cha kwanza cha mchezo baada ya kuitandika bao 1.

Hali ilibadilika kwenye kipindi Cha pili cha mchezo kufuatia shuti kali mithili ya bomu la Atomiki la Beki namba 3 Hussein Kitubwi lililonyooshwa kwa goti la kushoto likachungulia uvungu wa Moro Kids na kuzama kinywani mwa lango hilo huku nyavu zikitetema mithili ya kuku mwenye mdonde na kuandika bao la kufuta machozi.