VIONGOZI WA VYAMA VYA WAFANYAKAZI WAHIMIZWA KUWAKUMBUSHA WATUMISHI KUWA WAADILIFU

Posted on: February 10th, 2024

NA COSMAS MATHIAS NJINGO, GAIRO

FEBRUARI 10

Mkurugenzi wa Halmashauri Bi. Sharifa Nabalang'anya, amekutana na kuzungumza na Viongozi wa vyama vya Wafanyakazi Wilaya ya Gairo pamoja na Katibu Mteule wa Baraza la Wafanyakazi. Bi. Jane Sanga na Afisa Kazi Mkoa wa Morogoro ofisini kwake, muda mfupi baada ya uzinduzi wa Baraza la Wafanyakazi uliotanguliwa na uchaguzi wa Katibu wa Baraza hilo.

Pamoja na mambo mengine viongozi hao walijadili maswala mbalimbali ya kiutumishi ambapo walikubaliana kuhakikisha wanashirikiana pande zote mbili kudumisha upendo, nidhamu mshikamano na umoja katika utekelezaji wa shughuli zao za kila siku kwa kuongeza tija na ufanisi ili kuwaletea maendeleo Wananchi wa Gairo.

Aidha Mkurugenzi Sharifa aliwaomba viongozi wa Vyama vya Wafanyakazi Wilaya ya Gairo kuwa mstari wa mbele kuhimiza wanachama wao kujiepusha na vitendo viovu vinavyoweza kusababisha migogoro kazini kufukuzwa kazi au kushushwa vyeo na mishahara.

Sharifa alitaja baadhi ya vitend0 hivyo kuwa ni pamoja na utovu wa nidhamu ikiwepo utoro kazini, ulevi muda wa saa za kazi, wizi wa mali za uma, uharibifu wa vifaa vya ofisi, kuomba na kupokea rushwa, lugha za matusi, mavazi yasiyo faa kwa mujibu wa kanuni nz sheria za utumishi wa Umma.